தளைதட்டாத வெண்பா - காதல் : வைரமுத்து

மல்லிகா, துறையூர்: கேள்வி: - மண்ணுக்குள் போனாலும் மல்லிகா எனது கண்ணுக்குள் நீ வாழ்வாய் கண்ணே என்று எனக்கு வெண்பா எழுதியிருக்கிறான் என் அண்ணனின் நண்பன். எனக்குக் காதல் வந்துவிடும்போல் இருக்கிறதே!




வைரமுத்துவின் பதில்:

தங்கை மல்லிகா! மொழி பார்த்தோ, முகம் பார்த்தோ வந்துவிடக் கூடாது காதல், நேசித்தல்_ புரிதல்_ பொருந்துதல்_ மதித்தல் _ சத்தியம்_ சாத்தியம் எல்லாம் கூடிய கலவையே நல்ல காதல். இன்னொன்று_ உன் நண்பன் எழுதிய வெண்பா தளைதட்டுகிறது.

மல்லிகா என்பது கூவிளம் விளமுன் நேர்வர வேண்டும் வெண்பாவுக்கு; இங்கே நிரை வந்திருக்கிறது. என என்ற புளிமாச்சீருக்குப் பிறகு நிரை வரவேண்டும். இங்கே நேர் வந்திருக்கிறது. இன்னொன்று கண்ணே என்று முடியக்கூடாது வெண்பா. நாள்_ மலர்_ காசு_ பிறப்பு என்ற வாய்பாடுகளுள் ஒன்றால்தான் அது முடிய வேண்டும். ஆகவே மண்ணுக்குள் போனாலும் மல்லிகா என்னிரண்டு கண்ணுக்குள் நீ வாழ்வாய் காண் என்றிருந்தால் அது தளைதட்டாத வெண்பா. வெண்பா தளைதட்டினால் திருத்திக் கொள்ளலாம். காதல் தளை தட்டாமல் பார்த்துக்கொள்.



நன்றி: குமுதம்