கமலுக்கு "வாழும் வரலாறு" விருது

அகில இந்திய வர்த்தகர் சங்கம், "வாழும் வரலாறு" என்ற பட்டத்தை கமல்ஹாசனுக்கு வழங்குகிறது.

வரும் 28-ம் தேதி மும்பையில் நடக்கும் விழாவில் மத்திய தகவல், ஒலிபரப்பு துறை அமைச்சர் பிரியரஞ்சன்தாஸ் முன்ஷி இவ்விருதை வழங்குகிறார்.


தொழில் அதிபர்களையும், கார்ப்பரேட் அமைப்புகளையும் உறுப்பினர்களாக கொண்ட எப்.ஐ.சி.சி.ஐ இதுதொடர்பாக வெளியிட்டுள்ள அறிக்கை:

கலை வாழ்க்கை மட்டுமல்லாமல் தன் செயல்பாடுகள் அனைத்திலும் தனித்தன்மையும், நேர்மையும் கலந்து சிறப்புறச் செயல்படுபவர் கமல். திரைத்துறையின் முன்னேற்றத்தை நல்லதோர் எதிர்காலம் நோக்கி இட்டுச் செல்பவர்களில் முக்கியமானவர்.
இவரது தொழில் சிரத்தை மக்களும், சினிமாத்துறையினரும் நன்கு அறிந்த ஒன்று. சம்பாத்தியத்தை எல்லாம் தன் துறையிலேயே செலவிடும் வெகு சிலரில் கமல் ஒருவர்.


திரைக்கதைகள் யுக்தியாலும், கருத்துக்களாலும், வியத்தகு திரைக்கதையாளராக அவரை ஆக்கியுள்ளது. ஒரு இயக்குனராக பலதுறை வித்தகங்களை நெருடலின்றி ஒரே சீராக படைக்கும் திறமை இவரை இந்தியாவின் மிக முக்கிய இயக்குனர்கள் பட்டியலில் இடம் பெறச் செய்திருக்கிறது. தனது ரசிகர் மன்றங்களை நற்பணி இயக்கங்களாக மாற்றிய உலகத்து முதல் நடிகர்.


இவரது தலைமையில் இயங்கும் இவ்வியக்கம் சமுதாய கலாசார மாறுதல்களை தமிழகத்திலும் இந்தியாவிலும் ஏற்படுத்தும் என்பது உறுதி. தற்போது எய்ட்ஸ் விழிப்புணர்வுக்காகவும் கமல்ஹாசன் தலைமையில் இவ்வியக்கம் அமைதியாக அழுத்தமான தொண்டு செய்து வருகிறது.


பகுத்தறிவுவாதியான கமலுக்கு கும்பிடும் உருவமாக, மதமாக, மனிதம் மட்டுமே விளங்குவது ஆச்சர்யமாகவும், நிகழும் இந்திய அரசியலில் சார்பற்று இருந்து கொண்டே தேச சேவையில் ஈடுபடும் போக்கு வியக்கத்தக்கதாகவும் உள்ளது.